نادي الحيّ.. ويوم بدون رياضة..

  

تكلّمت المدربة “الهاجري” الصدق اني نسيت اسمها الاول ، -صحيح ان البداية توحي لكم اني ناسية اسم المدربة وش بيصير على باقي المعلومات – تشتغل بمكافحة المخدرات ، قالت معلومات كثير أغلبها نعرفها ومرّت علينا بالافلام او تكلموا عنها بالمجالس أو قريناها في النت.

بس المخيف أن معظم بدايات الإدمان تكون تجربة وأكثر الأحيان هروب من مشكلة وممكن تنخلط بشرب أو أكل من شخص متعاطي ويحاول يبيع المخدرات على أكبر شريحة من المجتمع ويكون واعي لتصرفاته ومحدد أوقات تعاطيه .
🔺
موقف طفولي:

طالبة برابع ابتدائي جايبة معها “قات” للمدرسة وتوزعه على زميلاتها بالفسحه وتعلمهم طريقة استخدامه ، ولما سألوها الادارة قالت عادي ماما وبابا في البيت ياكلونه والقات اللي ما يعرفه مصنف كعقار ضار ، وحتى طعمه مو سيء ، ما اسوّق له بس اعلمكم 🎵.

🔺
كيف نعرف ان الشخص متعاطي؟ أو مدمن؟

أنواع المخدرات واستخدامها متنوع ما بين تدخين او أبر او شمّ.

🔞 ممكن ينحط مع الشيشه ويطلع أصوات فرقعه ، واللي يلفّون الحشيش بسيجارتهم العاديه ممكن تلاحظ الفرق ان دخان الاحتراق يكون ثقيل اثقل من الدخان العادي وبرضو تصير العيون لونها أحمر، وممكن تكون ملفوفه بقصدير عشان يحافظ على رطوبتها.

🔞 الملعقة المعدنية المحترقة من تحت أو المفاتيح المحروقة ، ممكن تعطي اشارة ان الشخص متعاطي لان بعض الانواع تحتاج حرق فتكون الملعقة والمفتاح كحجم مناسبة تنحط في الجيب، ودي ادور صور من النت واحط لكم للتوضيح، ولكني فتاة تخاف من المناظر التي سيعرضها لي محرك البحث لذلك شغلوا خيالكم .

🔞 اذا كان الشخص يسوق سياره فغالبا بيكون في سيارته آثار اصطدام لان من اعراض بعض المخدرات يصعب على الشخص قياس المسافات و الزمن فتكون قراراته خطأ فيصدم كثير.

🔞 فرط بالمشاعر ضحك وبكاء وغضب وشك، اهمال المظهر الخارجي ، السهر المتواصل ليومين بدون نوم ، او النوم لوقت اطول من المعقول ، صرف مبالغ كبيرة بوقت قصير ، السرقة.

النقطة الاخيرة مو شرط تكون لشخص متعاطي ، ممكن مرض عضوي او نفسي او ضغوط عمل او دراسة ، بس لو لاحظ الأهل هالاعراض على أحد افراد الاسرة ياخذونها على محمل الجد، والمخيف لما يكتشف الشخص ادمان احد قريب له ، وش بيكون التصرف الصحيح ؟ 

المدربة اعطتنا رقم تلفون للتواصل وعلاج المدمن اسمه المركز الوطني لاستشارات الادمان ١٩٩٥ يستقبلون المكالمات بسرية وياخذون المتعاطي ويعالجونه بدون اي شوشره ، وبرضو رقم ثاني لو عرفنا عن احد مروج او يبيع مخدرات ٩٩٥ .
هالموقع فيه المعلومات بشكل علمي ومرتب “نبراس“، ولو كنتوا في الرياض الحين فيه بالجنادرية مكان عن مكافحة المخدرات ، وعلى قوله ام عبدالعزيز الله يحمينا ويحميكم ويبعد عنا وعنكم كل مكروه. 

الإعلانات

سواليف من العام : وش ارسم الجزء الثاني .. [ ١٠ – ١٠ ]

مسّيكم بالخير نكمل لكم اللي بديته في الموضوع اللي من يومين ، فكرة الرسمات حكيت عنها [ هنا ] بعض الرسمات بتلاحظون عليها تاريخ هالسنة لاني كملت رسم لحد شهر يناير من السنة الجديدة ومازلت ارسم وابشركم الكتاب صفحاته كثير.

  
  ٩١. هالعائلة من مسلسل فاميلي غاي .. على كثر ما شفت لقطات من هالمسلسل الا اني ما اذكر اني شفت حلقة كاملة على بعضها ، مشكلة هالنوع من المسلسلات انها موجهه للكبار وتحديدا المجتمع الامريكي فمو دايم افهم حسّ النكته اللي عندهم بالاضافه الى ان كلامهم والفاظهم مزعجة بالنسبة لي.

  ٩٢. على قوله مذيع لقيمات الكناني الأكل هو الفعل اللي تكرره باستمرار طول حياتك بدون ما تحس بالملل.  

  
٩٣. سبايدر مان .. هالرسمه طلبها أب لولده لانه يحب الشخصيات الخيالية بالأول طلب بات مان ولما رسمتها له قال لا قصدي سبايدر مان فرسمت الثنتين وشوفوا التناقض بين فكره الرسمتين .

  
٩٤.مستر بن .. اللي ضحكنا بدون ما يتكلم ، عرفت مؤخرا ان فكرة هالشخصية جاية من الفضاء ، فما يعرف الحياة على الأرض ولا عنده لغتهم عشان كذا يعيش وحيد ويتصرف بطريقة طفولية.

  
٩٥. سيمبا  بالأول رسمت سيمبا وهو صغير بعدين قال اللي اقترح هالرسمه لا ارسميه وهو شايب. 

  

٩٦. البنت اللي يمين هايدي واللي جنبها نسختها من قوقل ونسيت اسألها عن اسمها . 

 ٩٧. وكل الشخصيتين فوق اسمهم بلوتو 

  
٩٨.احبها هالماروكو حفظت كل حلقاتها 

  

 
 ٩٩. قعدت سنين وانا احسب جيري بنت وتوم ولد واكتشف ان كلهم اولاد .

   

  ١٠٠.عدنان ولينا وصديقهم عبسي .. لما وصلت الرسمات الاخيرة بعض الالوان قررت انها تخلّص فكنت بالقوّة اضغط ع اللون ، الزبدة اني امضيت وقت ممتع في استقبال طلبات الرسم والتطبيق ولسا باقي في الكتاب صفحات زيادة وبستمر استقبل طلبات الرسم .

.

.

وخلال شهر وسبعة ايام حكيت لكم ١٠٠معلومة تعلمتها من الناس العام ، شكرا للكثيرين الذين لا اعرفهم ، الذين اخبروني أمور لا أعرفها،شكرا للأشخاص الذين لو وُجدوا في مكان آخر لم اكتشف جمال هذه الأرض وتناقض من يعيش فوقها . شكرا لمن لا أعرف لهم اسم ولا طريق ولا عنوان ،إلا أنه صادف أن ألتقي بهم ويخبروني ما اخبروني ،مضى زمن وأنا أغرف من بحر ،حتى فاض التنور و فاضت أوراقي .

شكرا لهم ولكم ولي.

اشوفكم بنفس هالفكرة السنة الجديدة اذا تعلمت شيء جديد وربي مدّ في صحتنا واعمارنا .

سواليف من العام: وش ارسم ؟ [ ٩-١٠]

حيّاكم في آخر موضوع من سلسلة سواليف من العام ، صحيح اني وعدت ما اتكلم كثير وبتشوفون بس رسمات بالجزء التاسع والعاشر ، لكن بخلف بالوعد حفظا للحقوق الفكرية للناس اللي ألهموني فكرة هالموضوع وانه ليس من اختراعي او عبقريتي ، هالسالفة صارت على مرحلتين :

المرحلة الأولى:

عندي كتاب قديم ما اعجبني وما يسوى اني اهديه أحد فأرسلت سؤال للأشخاص اللي اتابعهم في تطبيق ask اطلب منهم افكار واقتراحات لإعادة تدوير هالكتاب وهذا ما وصلني:

– وضعه في حاويات اعادة التدوير ، والتخلص منه.

– مبادلته او بيعه .

– وضعه بشكل جمالي يملأ المكتبة او في ارجاء المنزل 

– العودة له في وقت لاحق.

– وهنا فيديو لفكرة حلوة يستخدم كرفّ للكتب.

– احد الافكار احول الكتاب لمفكرة شخصية وارسم واكتب على الهوامش واستفيد من كل المساحات المتوفرة فيه *اعجبتني هالفكرة وقلت برسم على صفحاته* لكن وش ارسم ؟

المرحلة الثانية:

تتذكرون تطبيق  drift bottle  ؟  تكلمت عنه [ هنا] اللي نكتب رسايل ونرميها في البحر ؟ بعض الرسايل ممكن ترجع لك ومعها رد ، حطيت الكتاب قدامي مع الواني واقلامي و جلست كم اسبوع وانا اكتب هالرسالة وارميها في البحر :

اقترحوا وش ارسم شخصية كرتونية؟ 

وصلتني اقتراحات كثير ورسمت اكثر من أربعين رسمة ، بنزل الحين عشر رسمة ، والجزء الجاي عشر ،والعشرين الباقية بنزلها بأوقات متفرقة من هالسنة.. وتوتا توتا خلصت الحدوتا ..

١. أول رسمة أعلاه بمناسبه النظرية الداروينية اللي آخذه نطاق واسع من الجدل والأخذ والرد بين العلماء والعامة.

  ٢. أصرّ الديناصور ان يظهر على صفحات الكتاب ليثبت ايضا انه موجود واحافيره اكبر دليل على وجوده.

  
٣. عارفين ان البطريق لما كان بيضه ابوه اللي يهتم فيه لحد ما يفقس؟ وقتها الام تكون راحت رحلة سياحيه في المحيط مع صديقاتها وما ترجع الا بعد ما تفقس بيضتها ؟ 

  
٤. الحلزونا يمّا الحلزونا*ا

  
٥.نسيت اظن اسمه بسيط؟ طالباتي مفتونين بهالشخصية

  
٦.هالسنجاب تورط بقطعة المكسرات اللي بيده طبعت جسمه بالالوان 

 

٧. صديقنا عبقور 

    
    

   ٨. انا زينة الجميلة *مع الاعتذار الشديد لاختلاف المقاسات كأني كبرت كرشتها شوي؟ ضروري تروح معي نادي الحيّ مع شوي تمارين ستعود زينة لسابق عهدها.

  ٩. سالي .. دراما كوين الطفولة 

  
١٠.شوون ذا شيب .. الشخصية اللي يفضلها ريوّ الحب💘

.

.
باقي عشر رسمات بحطها قريب 

-ان ربي اعطانا عمر –

🌹 

سواليف من العام : من وسط صدور الناس [٨-١٠]

  

هالجزء يشبه مجلس نميمة ، يشد البشر في معرفه التفاصيل حياه ليست لهم وان تعرّت فلا بأس ماداموا ليسوا طرف في تفاصيل الحكاية ، وبين جملة وأخرى نردد “الحمدلله الذي عافانا” ؟ وين العافية في الكلام عن الناس ؟ ومع ذلك بحكي لكم القصص بدون تفاصيل شخصية ، نمضي وقت ونكسب شوي معرفة.

🌧🌧

١.ابتزاز الكتروني..

هالفكرة واردة بشكل كبير وممكن يقع فيها اي شخص بأي عمر ، والابتزاز يكون عن طريق شبكة من الاشخاص او بشكل فردي، لذلك يفترض يكون الانسان اكثر حرص ووعي وماينشر معلوماته الشخصية او بياناته الرسميه زي رقم هويته الوطنية او الرقم السري لحسابه في البنك وكمان ما يستعبط ويفتح روابط مشبوهه مو مواقع او اشخاص غير معروفين ، وحده من زميلاتي وصلت لها حواله بنكيه نصيبها من ورث ابوها -الله يرحمه- ، كانت فاتحه برنامج محادثه مع شخص يقول انه من البحرين وعنده ملف او صورة ما انفتحت بجهازه فطلب من زميلتي تجرب تفتحها له ، اللي صار ان الرابط اللي اعطاها ساعده على اختراق جهازها ، وقالها صح رصيدك في البنك واعطاها المبلغ رقما واعطاها كمان بعض تفاصيل الحوالات البنكية، وقتها خافت انه يسرقها وماعرفت كيف تتصرف ، لكنه قال انا اتعلم على التهكير والاختراق ولا افكر اسرقكم بس المره الجاية لا تفتحين روابط مجهولة. 

وعلى سيرة الابتزاز تفرجوا فلم disconnected تكلم عن خطورة الشبكات الاجتماعية وسهولة الحصول على معلومات شخصية حتى عن طريق الاصدقاء او زملاء المدرسة، الفكرة مخيفة وبنفس الوقت ممكن مع كل هالحذر تقع فريسة للابتزاز او السرقة.

🌧🌧
٢.عملية (تكميم – تحوير – بالونه)..

من المواقف اللي صارت العام مقابلتي للعديد من الاشخاص اللي سووا أحد هالعمليات اللي تساعد على التخفيف من الوزن وكل وحده من هالعمليات لها طريقة واسلوب مختلف عن الثانية ، كانوا البنات يتكلمون عنها كأنها شيء سهل ، اسهل من شكّة الدبوس ، ويفترض ان هالخطوة يفكرون فيها بجدية أكثر ومايسوقونها لبعض، فكرة الرجيم ونمط الحياة الصحي الكثير يتكلم عنها ، ولما يجي وقت التطبيق يشوفون ان العملية الجراحية هي الحل الاسرع .

في النادي تقول وحدة من البنات بتدرب شهر اذا ما نحفت وراحت الترهلات بروح للدكتور يقصها لي ، يالله تشوف جسمها مثل القماش .

🌧🌧

٣.طبيب عربي ..والمجتمع البدوي..

قريت كلام لطبيب عربي اشتغل في مستشفى بالسعودية في قسم النساء والولادة،  و على حد زعمه عرف المجتمع السعودي “البدوي” مثل ما حب يسميه بكل اعماره واجناسه وحريمه ورجاله ، صوّر الوضع مأساوي و درامي فيه من السوداويه الشيء الكثير ، على قد ما استفزني كلام هالطبيب الا اني في كل مرة احكي كلامه للي حولي القى ردود الافعال متفاوته ما بين مؤيد ومعارض .

لو فرضنا هالطبيب اشتغل في مطعم أو محل مجوهرات كيف بتكون نظرته ؟ اذا انت في مستشفى فاكيد بتقابل حالات مرضيه ونفسيتها بتكون اقل من الناس الاصحاء المهم اني مازلت مقهوره منه .

🌧🌧

٤.أخاف من خوفي عليك**..

-ايمان كيف الواحد يتخلص من خوفه ؟

-اتذكر جلست دقايق وانا ارتب افكاري واصنف انواع الخوف ، وفيه خوف ضروري يكون موجود بداخلك يعني خوف غريزي يجنبك الوقوع في الاخطار سواء خطر جسدي او نفسي، وفيه نماذج او مواقف مترسبة من الطفولة ممكن مواجهتها وعلاجها، المهم لما خلصت فقرة الكلام النظري التنظيري والنصائح النموذجية المثالية ، اعترفت اني اخاف من الأصوات العالية ، ونعم أيها الساده “باب النجار مخلوع” . 

🌧🌧

٥.احتاج وسادة ..

تنوّمت صديقتي مع بنتها في المستشفى ، وقضينا ليلة كاملة واحنا نتكلم عن تفاصيل الغرفة وعدد الأسرّة والحالات المرضية وعدد الأشخاص وحتى أسلوب تعامل الممرضات ، وكان معظم محادثتنا عن السرير الوثير والاقتراحات البديلة التي يمكنها القيام بها لتنعم بنوم هاديء.

 مهما كانت طريقتك في النوم اليومية فأنت قد اعتدت عليها سواء بسرير او بدونه بوسادة او بلا وسادة ، الله يديم العافيه علينا وعليكم وتكون وسايدكم دائما وثيرة، وحبايبكم بصحتهم دايم.  

🌧🌧


٦.باقي ترم ويتخرج..

معلمة رياضيات اشتغلت معها بنفس المدرسة أم لولدين وبنت، واحد من هالأولاد اللي بحكي لكم عنه تخصصه كيمياء وكان باقي له ترم ويتخرج من الجامعة، ولما صارت الحرب  خافت على ولدها وقطعت دراسته وجلس عندها في البيت ، انتظروا الحرب تخلص مرت سنه ورى سنه والولد ما كمّل تعليمه واصبح شبه مستحيل يرجع يكمل الترم اللي باقي له ويتخرج .

كمّلت سنه ما اعرف عن اخبارهم شي ، ووصلتني دعوة لحضور زواجه هذا الشهر ، على قد ما فرحت الا اني اعرف انها مو نهاية سعيدة زي نهايات قصص ديزني لاند. 

وفي الحروب قصص وحكايا توجع القلب .

🌧🌧

٧.أمه عايفته..

اللي نعرفه عن الأم عاطفتها وحبها المطلق لأولادها وهالشيء ماحد ينكره ، الغريب او اللي ممكن نحكي فيه لما الأم ترمي عيالها وتعيش حياتها بعيد عنهم وباختيارها .

ممكن تسمع عشرات القصص عن أب يختفي من حياة اولاده بس أم ؟ زميلتي بالدوام تقول انها ماتعرف شكل أمها ولا تدري هي وين عايشه ، قلت يمكن ابوك منعها تتواصل معكم ؟ انتِ دوري عليها واسألي عنها ، لكنها قفلت على الموضوع بجملة وحده “الأم هي اللي تربينا مو اللي تولدنا”.

وكمان واحد يحكي عن زوجته جابت ولد معاق وماحبته فطلبت الطلاق وتركت الولد مع ابوه وتزوجت واحد ثاني ، الصراحة نسيت باقي القصة الاكيد انها عافت *كرهت* الولد وابوه .

🌧🌧

٨.الأرواح الشريرة العين والسحر..

في مجلس نسائي تتصدره معلمة قرآن سألتها وحده بكل حماس:

-وش الفرق بين العين والسحر ؟

الصدق ان معلمة القران اول شيء قالت :

– ما اعرف

بعدين استطردت وقالت:

– السحر يتكلم الجني اللي فيك ، اما العين تحسين بالمرض بدون ما يتكلم الشيطان اللي فيك .

وتوسعوا بالحديث عن الجني العاشق وكان الموضوع ياخذ جانب فيه من الخشوع والحماس لدرجة ترديد سبحان الله ويا الله ،  رغم ايماني بالعين الا اني عجزت اجزم بتشخيص الحالات اللي تصير قدامي، الانسان غالبا يبرر فشله او اخفاقه بالعين والحسد كاقرب مخرج لتقصيره ،زي  حالات الفصام المرض النفسي اللي يمكن حله بادوية نفسية كان كثير ناس ومازالوا يحلفون انه سحر ، طيب ليه المريض يستجيب للعلاج اذا كان مسحور ؟

حالات الاغماء اللي ممكن تصير لبنت في المدرسة او الجامعة مو بالضرورة لجمالها وحسنها الفتان ممكن تروح الدوخه اذا افطرت كويس قبل تطلع من البيت او عندها فقر دم والا نقص فيتامينات سوء التغذية يعتبر امر يمكن حلّه .

عموما موجه السحر والمسّ فيها تفاصيل تقدرون تقرون عنها اكثر في تويتر على هاشتاق اسمه #تجارة_الوهم.

🌧🌧

٩.زلزال باكستان
 

العام وحنا راجعين من النادي ما فيه الا انا وبنت، ومابين زحمات وصبات وتحويلات ولا فيه مكيف، فاتحين الشبابيك ويهفهف علينا نسيم الخريف كانت البنت تسولف وانا اسمع بكل حماس عن اخوانها وامها ومشكلة صايره عندهم في البيت ..وفي الخلفيه السواق جايته مكالمه ع الجوال ويتكلم يتكلم بدون انقطاع بالاوردو ، سكر السماعه من هنا ونادا بصووت عاالي مدااام مدااام

قالت زميلتي : 

– نعم يا عبدالله وش فيه ؟ 

– مداام يعرف زلزال ؟ بابا يكلم من باكستان قبل شوي يقول فيه زلزال ..

تذكرت اني قاريه بتويتر عن زلزال جاي افغانستان وباكستان انا والبنت بصوت واحد

– ماما كويس ؟ 

– ماما موت قبل اربع سنه .. بس فيه نفرات ثاني موت ..

– يالله

وارجع اسولف مع البنت عن ساكو مسوين تخفيض على قلايه فليبس ، ومازلنا ناشبين بالزحمات والتحويلات ،الا اني انتبهت ان الارض ثابته تحتنا مع انها بمكان ثاني ليست كذلك .

*هالسالفه نقلتها نصا من الباث حتى السالفة اللي تحتها ، البنات اللي قروها من قبل اعتبروها مراجعة وتثبيت لمعلوماتكم .
🌧🌧

١٠.الخالة أم ناصر

بتاريخ ١٦ سبتمبر ٢٠١٥

لي زميلة قصيمية امها من سوريا ، كانت تحكي انها عاشت بقرية صغيرة وان السعوديين يجوون بالصيف يتزوجون شهر شهرين ويرجعون السعوديه ما ياخذون زوجاتهم معهم بس يعطونهم فلوس ويشترون بيت ويرجعون لحالهم السعودية.. 

ومن هذا المبدأ تزوجت هذا الشايب السعودي عشان يشتري لها بيت تقعد فيه مع اخوانها وتهتم فيهم لانها الاكبر ولانهم ايتام ..

اللي حصل ان ابو صديقتي لما خلص مصيف بسوريا اخذها معه للسعوديه وحملت ثلاث مرات ورى بعض مرتين جابت توأم والثالثه ولدت زميلتي، ومات أبوها ، ما قدرت ترجع لسوريا لانها ما تقدر تترك عيالها ، وقبل ما كانت تقدر تترك سوريا عشان ما تترك اخوانها الصغار .. 

كانت تتصل على امها بالدوام وتحط على السبيكر وكلنا نسولف معها .. تجنن هالانسانه شفتوا نظام الامهات اللي كل شيء له دعوة ووزن وقافيه ؟ وبين كل كلمه والثانيه ديروا بالكم على بنتي وانتي يا بنتي انتبهي لحالك .. 

وصلني خبر وفاتها امس بقروب زميلاتي وبسرعه تذكرت احداث حياتها، وكلام بنتها عنها ، وكلامنا معها ،الكل بالدنيا له قصة حتى لو كانت عادية المهم انها مليانه احداث ومشاعر وبدايات ونهاية .. 

الجنّة يارب لكل الصابرين 

والصبر يارب لكل الجازعين 

🌧🌧
عارفين اني سولفت عليكم ثمانين سالفة من الجزء الأول حتى هالجزء ، نعم هذا هو الاختصار الحرفي لبالعه مسجل ، وباقي على الرقم ميه (عشرين ) وابشركم بتكون كلها رسمات يعني  الكلام الجاي اقلّ . 

الى اللقاء ..

سواليف من العام: زحمة معلومات  [ ٧ -١٠]

أما قبل : حيّاكم حيّاكم ومعليش على التأخير الغير مخطط له ، المفروض اكون نزلت الجزء الثامن هالاسبوع وهذا الموضوع الاسبوع الماضي، لاني انقهرت قعدت اكتب وارتب الموضوع  وقفلت الصفحة بدون ما اسوي حفظ .*سكته قلبيه صغييييره*

 أما بعد: هالجزء دسم والمفروض تكون كل معلومة جزء لحالها ، المعلومات اللي اكتشفتها العام متفرقة ومتنوعة ومافيه أي رابط بينها ، السبب اختلاف خلفيات الاشخاص اللي اخذت منهم هالمعلومات ، المعرفة ستأخذكم من الخليج الى المحيط .

  

١.الغجر 

اختلفت مسميات الغجر  ( صلب ، نَوَر ، مزاينه ، الكاويه) وهالاختلاف حسب المناطق اللي يعيشون فيها ، لكنها تصب في نفس الفئة اللي يعتقد ان اصولهم كانت في الهند ، قريت عنهم في كتاب الغجر ذاكرة الأسفار وسيرة العذاب للمؤلف جمال حيدر ، تكلّم عنهم بحيادية دون تعاطف او تحامل عليهم ، رغم انهم يعيشون في مجتمعات تنبذهم دائما ومستحيل أحد يتزوج منهم، وممكن يستخدمها أحد كشتيمه او سبّ لما يقول لشخص آخر يا صلبي ماعليك منه هذا مثل النَوَر، مع انهم فئة مجهولة التاريخ ولايعرف عن ماضيهم الكثير ..

– مشهورين بالغناء والرقص وغالبا يحييون حفلات الأعراس للناس. 

– مهنتهم السرقة ومايشوفون ان السرقة عيب ، يمكن هذا من أسباب نبذ المجتمع لهم ؟ 

– الأم أو البنت هي المسؤولة عن توفير لقمة العيش لأسرتها لذلك تشتغل في السحر وقراءة الطالع بالاحجار أو الفنجان.

– تمت تصفيتهم عرقيا في الكثير من البلدان حول العالم خصوصا في فترة النازية للالمان و اعدموا بالغاز زيّ اليهود بس لأنهم متفرقين ومو مجتمعين ما تباكوا على حرقهم زيّ ما يسوون اليهود بافلامهم عشان يكسبون تعاطف العالم.

اتوقع مع تطور الحياة ممكن يذوبون الغجر في المجتمعات اللي يعيشون فيها وماراح يكونون معزولين ومنبوذين زي زمان .

ا
..🕳..

  
٢. الامازيغ

هم السكان الأصليين لشمال افريقيا ، ومعنى الاسم  الإنسان الحر النبيل أو ابن البلد وصاحب الأرض، فيديو قصير تعريفي عنهم [ من هم الأمازيغ ؟ ] ،  ولو تعرفون مين من المشاهير ترجع اصولهم للامازيغ ما راح تصدقون ، مصدري من ويكبيديا مارجعت لكتب الا لشخصية او ثنتين بس .

عباس بن فرناس ( اول من حاول الطيران )

زين الدين زيدان ( لاعب اصوله جزائرية واشتهر بالنطحه)

محمد بن عبدالكريم خطابي ( جبت سيرته هنا )

طارق بن زياد  (وانا اللي كنت احسبه عربي هالمعلومه اكتشفتها برضو في كتاب تاريخ اليهود المصور لطارق السويدان)

ابن بطوطه ( الرحالة المسلم )

الأمازيغ ..الإنسان الحر ..

لو كان كل شيء سهل بسهولة معاني العبارات..

الاقتباس اعلاه لبدريه ❤️..

ا
..🕳..

  

٣.أماكن سياحية

ثقافة السفر والترحال والتصوير والتوثيق اصبحت هوس عند البعض، وممكن المسافر ما يستمتع بالرحلة الا اذا رجع وتفرج على الصور ،  اخترت أربع أماكن من مدن متفرقة وماراح اقول وين ، مو لأني ناسيه وإنما من باب التشويق والاثارة ، مين اللي يجاوب الاربع صور صح؟ 

تحديث: الصور بالترتيب من فوق يمين المدينة المنورة ، الرياض، ينبع ، الدوحة  

  

..🕳..

  
٤.شجرة دم الأخوين 

قد صارت معكم هالظاهرة؟ اللي تتعلمون معلومة جديدة فتلقونها بوجهكم في اكثر من مناسبة ؟ هالشي صار معي  وهالشجرة اللي فوق ، موجودة في جزيرة سوقطرة باليمن ، شكلها جميل صح ؟ معلومات اكثر عنها [ ويكبيديا ].

ا
..🕳..

  
٥.صديقي  komondor

هالكلب كنت اشوفه بافلام كرتون زمان واحسبه شخصية خيالية لحد ما شفت له برنامج وثائقي ويصنف انه شرس ويستخدم لرعي الاغنام ويهجم على الذئاب اللي تحاول الهجوم على القطيع ، والذيب المسكين يصير يخاف حتى من الخروف لانه يشبه هالكلب . [ فيديو ]

ا
..🕳..

  
٦.أكل * أكل

برضو مانسيت اسماء هالاكلات ، بس خلونا نعرف ثقافتكم في الاطعمة حول العالم العربي – الصور اخذتها من النت – ، وللمساعدة بقولكم اسماء الدول وانتو اعرفوا اسم الأكله. بالترتيب من فوق يمين ( المغرب – اليمن – مصر – السودان ) باكتب الاجابات بعد كم يوم  . 

تحديث: هههههه نسيت اصبروا فوق يمين اكله مغربية اسمها طاجين ، اللي جنبها خبز من اليمن اظن خبز ملوح ، اللي تحت من مصر اسمها كشري ، اللي جنبها من السودان اكله تتصلح من الباميا ونسيت اسمها .

..🕳..

  
٧.كيف نقييم الافلام قبل نشوفها ونعرف اذا هي مناسبة او لا ؟ من موقع imdb

تفتحون الموقع وتبحثون عن اسم الفلم وتشوفون التصنيف تحديدا الحرف المكتوب عند اسم الفلم اذا :

G: يعني الوضع أمان يناسب كل الأعمار .

PG: برضو مناسب ويفضل يكون فيه توجيه من الأبوين أو أحد كبير يكون موجود مع الصغار .

PG 13: هذا برضو يحتاج تواجد الابوين للاطفال اللي اقل من ١٣ سنه ، طبعا هالتصنيف امريكي فممكن يكون فيه اشياء ما تناسب ثقافتنا .

R: وجود مشاهد عنف أو مشاهد جنسية واضحة .

NC 17: هالتصنيف ماقد شفته شكله مب زين بتاتا البته.
هنا شرح [ بالفيديو ] عشان تعرفون وين مكان التصنيف، وبرضو لو حابين تشوفون التصنيف حسب الدول المختلفة [ هنا ] لأن اللي كتبته لكم تصنيف امريكي . 

..🕳..

  
٨.لغة الجسد

هالموضوع بحر ومتشعّب وفيه دلالات كثير على حركة الجسم حتى لو كان الشخص ما يتكلم ممكن تعرف وش يفكر فيه واذا كان مرتاح او متضايق ، بعض الشغلات نعرفها وسهل اكتشافها.

لغة الجسد يعتمدون عليها المحققين في اكتشاف المجرمين، والمدراء في مقابلاتهم مع الموظفين الجدد وكمان في العلاقات العامة بين الأهل والأصدقاء ، وحتى بين البائع للتسويق لسلعته  .

بعض الشغلات اللي تعلمتها من لغة الجسد:

– الشخص اللي يكتب باليمين اذا حاول يتذكر أي معلومة يرفع عيونه لجهه اليسار ، جرّب اسأل أحد قريب منك وشوف اتجاه عيونه وين بيكون ، طبعا اللي يكتب بيده اليسار بيكون اتجاه عيونه عند محاولة تذكر اي معلومة بجهه اليمين . 

– اللي يلمس طرف اذنه وهو يتكلم معناها يحاول اخفاء بعض المعلومات ، واللي يلمس طرف خشمه معناها ما يقول الحقيقة.

هالمعلومات قاريتها من كتاب اسمه لغة الجسد لكن نسيت اسم المؤلف والكتاب مو عندي فجالسه اكتب لكم من ذاكرتي .

..🕳..

  
٩.ذكريات كرتونية

هالموضوع اللي مستحيل أملّ منه دايم نسولف عن الاحداث القديمة لافلام كرتون اللي كنت اتابعها زمان *ومازلت* ، من توم وجيري والبطل خماسي والأميرة ياقوت وسالي وليدي وهايدي والصياد الصغير وكابتن ماجد والنينجا وينابيع المعرفة، ذيك البنت اليابانيه اللي تقول هيّا بنا كوميساااان هيا بنا لنعرف الحقيقااااه ، والمجانين الثلاثه وباباي والنمر الوردي كنا نسميه ترم ترم ، وحكايات ما احلاها … 

وانتو تكلموا عن ذكرياتكم الكرتونية ؟

ا
..🕳..
١٠.اتفاقيه سايكس بايكو

مالي في السياسة ولا اعرف كوعي من بوعي ، ولو قالوا الشمس في السياسة تشرق من المغرب قلت ما ادري ، فتعتبر هالاتفاقية و التقسيم اللي صار عام ١٩١٦ بمباركة  فرنسا والمملكة المتحدة ، هي المعلومة السياسية اللي تعلمتها العام الماضي ويعتبر هذا من انجز الانجازات بالنسبة لي ، مع اني انقهر لان غالبا اذا عرفت بنقهر اكثر ، وشكرا .

سواليف من العام: التطبيقات الجزء الثاني للايفون والاندرويد [٦-١٠]

حيّاكم من جديد في الجزء الثاني من التطبيقات اللي حملتها العام ، وشكرا لكل التعليقات والزيارات اللي وصلتني في الجزء الأول ، ومتأكدة أن هالجزء بيعجبكم أكثر لأنه يهتم بالجانب العاقل والرزين اللي المفروض يكون داخل كل انسان تجاوز مرحلة الطفولة مب ألعاب وتضييع وقت ><، وتقدرون تحملونها على أجهزتكم وتستفيدون منها لأن بعضها صوتية وتطبيقات ثانية متفرقة .. 

  
١. قناة سايوير بودكاست ، قناة علمية بحته يقدمها الدكتور محمد القاسم ، مستوعبين انه يتكلم في الحلقه لمدة ساعة تقريبا، ومع ذلك يشدّك من أول دقيقة لنهاية البودكاست بتسلسل افكاره، مناسبة للاستماع في طريق سفر او بمكان مافيه مشتتات كثير حولك  ، من الحلقات اللي حبيتها واخترتها لكم تسمعونها [ هل نحن وحيدون في الكون ، الألغاز ، حقيقة الأشياء ، الإيثار من منظور العلم ] تقدرون تكتفون بالقراءة مو بالضرورة تسمعون الحلقة صوتيا.

رابط الموقع : http://sciwarepod.com

رابط التطبيق على الأجهزة المختلفة [ من هنا ]

..🤖..

  
٢. تطبيق اسمعلي .. مجموعة كتب صوتية وعشرات البودكاست ومصنف لقنوات كثير موجود من بينهم سايوير بودكاست ، برضو تنفع بالطرق الطويلة في سفر أو وقت استرخاء ، كمية معلومات موجودة في هالتطبيق تكفيك لسنة قدام .

رابط موقعهم : http://esm3.ly

للتحميل في App Store  و Android

..🤖..

  
٣. تطبيق رواق يبدو لي ان هالتطبيق بيكون تطبيق هالسنة الجديدة اتذكر اني حملته مع مجموعة تطبيقات وسويت لي حساب بعدين انشغلت، والحين لما جيت اكتب عنه اكتشفت اني ما اعرفه كويس ، من نظرة سريعة واضح أن الشغل فيه شيء جبّار ، هي منصة عربية للتعليم المفتوح ، محددة بوقت واهداف ومدربين حسب كل تخصص .

موقعهم على النت:https://www.rwaq.org

وفيه كل الدورات وروابط التحميل حسب نوع اجهزتكم اللي تستخدمونها.

..🤖..

  

 
٤. تطبيق للمانجا وهالكلمة معناها باختصار شديد القصص المصورة عند اليابانيين ، وأكيد مافيه زي الكتاب اللي تمسكه بيدك وتقلب صفحاته ، لكن هالتطبيق الحلو فيه ان التصفح سلسل والمانجات فيه متجددة .

تحميل التطبيق : App Store  و Android
..🤖..

  
٥.تطبيق  memrise لتعلم اللغات ، اكثر شيء في الستور  التطبيقات اللي تعلم اللغات ، حبيت هذا التطبيق وكملت شهرين وانا اتعلم انجليزي وفرنسي ، السؤال: هل اتقنت اللغة ؟ هذا ما سنعرفه عندما اكمل سنه بالتمام والكمال 🎵.

تحميل التطبيق AppStore و Android
..🤖..

     

 ٦.تطبيق آية وتطبيق فاذكروني وتطبيق التقويم الهجري
هالتطبيقات فيه منها عشرات تقدرون تختارون اللي تحبون واللي تتعودون عليه وما فيه تفاصيل وزحمه، الأول القران والثاني مواقيت الصلاة والاذكار والثالث التقويم الهجري .

..🤖..

  
٧.تطبيق pinterest

هذا التطبيق يصنف ضمن المواقع والشبكات الاجتماعية لنشر الصور واعتبره المنقذ على جميع الأصعدة مثلا نطاق التعليم سواء كنت اكاديمي او تحت التدريب او طالب وانطلب منك افكار بروشرات او اعادة تدوير او رسمات ، ولو كنت تأثث مكتبك أو غرفة في البيت وتدور افكار ، او جوعان وتدور اكلات ، اكتب اللي تفكر فيه وشوف آلاف الأفكار والاقتراحات وبالصور، هالموقع هو مصدري الأول في الحساب التعليمي الخاص بالأطفال.

رابط الموقع : https://www.pinterest.com

رابط التحميل App Store   و Android 

..🤖..

  
٨.we heart it هذا التطبيق يعتبر تغذية بصرية من الطراز الرفيع ، أحب موقع التمبلر لأن الصور فيه كثيرة ولقيت هذا اللي ممكن نقول انه اخوه الصغير لانه يعرض صور فقط بدون كلام ولا روابط ك ولا شيء ، فقط صور من كل شكل ولون ، لذيذ لذيذ لذيذ اتعب وانا اعبر عن حبي وتقديري لهالتطبيق واغلب الصور الموجودة بالمدونة اخذتها من هالتطبيق .

رابط التطبيق على App Store و Android

..🤖..

  
٩.المتصفحات سفاري و فايرفوكس و كروم و دلفين

كل متصفح فيه مميزات تختلف عن الثاني ، اتذكر كنت ابحث عن متصفح يدعم ملفات الجافا وكان دلفين اظن او فايرفوكس ، المهم إني صفّيت هالمتصفحات جنب بعض وكل واحد استخدمه شوي ونصيب الاسد من نصيب سفاري لانه المتصفح الافتراضي بجهازي، تقدرون تبحثون عنها بدون ما احط لكم روابطها.. صح؟ 
..🤖..

  
١٠. تطبيق  drift bottle رسايل البحر.. هالتطبيق فكرته بسيطه وتشبه الروايات الاسطورية اللي تكتب رسالة وتحطها في علبة وترميها في البحر ، ومن بين عشرات الرسايل اللي ترميها ممكن أحد يرد على رسالتك .

انسخوا الاسم وابحثوا عنه في الستور ، اعتبروا الستور البحر وانا اعطيتكم العلبه ، واكتبوا رسايلكم الطويلة وارموها في البحر لعلّها تصل لشاطئ ما ويستفيد منها احد وممكن تغوص في الأعماق ولا أحد يطق لها خبر ..
فمان الله ، ومعالسلامه ، والى اللقاء اشوفكم ان شاء الله في الجزء السابع من سواليف العام ..

.

.

سواليف من العام:  تطبيقات ألعاب ذهنية وتنافسية للايفون والاندرويد [ ٥-١٠]..

  

أحب الألعاب التفاعلية أو اللي يكون فيها تحليل وتفكير وملاحظة ، حتى الألعاب اللي فيها أرقام أو مقارنة و تركيز  ، أما الاسئلة والحروف والكلمات فهي عششقي ، من الالعاب اللي اكتشفتها وحملتها على اجهزتي ، ولو لعبت بعضها معكم كسّرت راسكم 👼🏼..

  
١. المواجهة .. اسئلة ثقافية مع شخص منافس لك حملتها زماان ورجعت حملتها العام التحديثات في هاللعبه حلوه ..اسمي في اللعبه هناك emans3od  لو ماضبط البحث معكم هذا رمزي في اللعبة 10205752416234619 ومازلت انهزم شرّ هزيمة ومع ذلك روحي ماتزال رياضية. 

رابط تحميل اللعبة على App Store ،

وبرضو موجودة باجهزة Android 

..🤖..

  
٢. BrainWars  .. أحب أعرفكم على أطلق لعب تنافسية تلعب فيها مع خصمك بنفس الوقت أربع مسابقات مختلفة تعتمد على السرعة عشان كذا توترني تعتمد على الذاكرة والحساب والمقارنة والتركيز كل جولة مسابقاتها تختلف عن الثانية وكل ماجبت نقاط عالية تصعب المنافسة عليك ، تقدر تعلب مع اي شخص بشكل عشوائي أو مع اصدقائك ، تبدأ اللعبة وعقلك زي الدجاجة وبعدين تتطور أنا وصلت عقل الدلفين، الكود الخاص بحسابي في اللعبة هو BXV2032 ما اعرف اذا راح يضبط والا كل اضافة بتكون بكود مختلف .

رابط اللعبة لأجهزة الايفون على App Store 

ولها نسخة على أجهزة Android 

..🤖..

  
٣.هرم المعرفة *اغلب الاسئلة فيه موسيقية *

تشبه شوي لعبة المواجهة تنافسية بينك وبين اصدقائك أو تلعب المغامرة لوحدك تختار التصنيف اللي تحب لحد ما توصل القمّة، الجد ان اسئلته صعبه . تقدر تلعب بشكل عشوائي او تربط حسابك بالفيس بوك وتلعب مع اصدقائك. رابط اللعبة على App Store  وهنا للي أجهزتهم Android

..🤖..

  
٤.تحدي الكلمات يحطون لك مجموعة حروف وتكون منها اكبر عدد من الكلمات وكل ما كانت الكلمة حروفها كثيرة صارت نقاطك أكثر وضروري تسبق الخصم بكتابتها ، تقدر تلعب هاللعبة مع اشخاص عشوائيين أو اللي مضيفهم عندك بقائمة الأصدقاء رابط اللعبة على App Store بحثت بشكل سريع لأجهزة الاندرويد ما لقيتها ابحثوا عندكم يمكن تلقونها.
 ..🤖..

الست الالعاب الجايه شخصية ، يعني تلعبها لحالك مو تفاعليه مع اشخاص ثانين ، برضو احبها والعبها كثير.

  
٥.سودوكو .. ترتيب الارقام من واحد لتسعه في شبكه بدون ما يتكرر الرقم في الصف او العمود او الشبكة الصغيرة .. هاللعبه اصلها شرق اسيوي يمكن ياباني وكانت موجوده بالجرايد والمجلات زمان زيّ الكلمات المتقاطعه واوجد الفوارق. نسخة اللعبة اللي ألعبها على App Store مو شرط تحملونها نفسها فيه العشرات من ألعاب السودوكو اكتبوا بمحرك البحث واختاروا اللي تحبونه ، وبرضو هنا رابط لها لأجهزة Android

.. 🤖..

  
٦.كلمة السر ٢ هاللعبة شارحة نفسها بنفسها كلمات متقاطعة بمواضيع مختلفة ولما تخلص من الكلمات بيكون فيه حروف متفرقة هي اللي بتكون كلمة السر .. هاللعبة ادمان وتزيد حصيلتك اللغوية رابطها على App Store و Android
.. 🤖..

  

٧.وصلة وأنا اكتب هالتدوينة اكتشف اني محمله هاللعبة من زمان ولسا ما لعبتها ، جربتها على السريع عجبتني كلمات متقاطعة تجمع ما بين الاسئلة الثقافية و الدينية والصور جربوها رابطها على App store  و Android

.. 🤖..

  
٨.لعبة مخ .. لعبة جميلة خليط بين اربع صور ونكتشف الرابط بينها وبين صوره وحده مقربة والغاز واكتشاف الصوت حبيتها هاللعبة خصوصا ان تصميمها والانتقال بين المراحل والاصوات شغل متعوب عليه رابطها على App Store ما اعرف اذا هالنسخه موجوده في للاندرويد لو لا دورت بشكل سريع مالقيت.

.. 🤖..

  
٩. سبع كلمات .. حليوه تجمع بين الكلمات المتقاطعه وكلمة السر ، تصميمها بسيط ، اعتبرها تمضية وقت مالعبتها كثير رابطها على App Store و Android

.. 🤖..

  
١٠. Memorado هاللعبة تشبه اللعبة رقم ثنين تطور مهارات التركيز والملاحظة والمقارنة والحساب مع ان فيه شغلات كثير ما فهمت شلون اسويها ، رابط اللعبة على AppStore و Android

.. 🤖..
لو مافتحت معكم الروابط انسخوا اسم اللعبة وابحثوا في الستور او المتجر وحملوها ،  الجزء الجاي ان ربي اعطانا عمر بكمل لكم التطبيقات اللي اكتشفتها وحملتها ، ممتنة لزياراتكم وتعليقاتكم 🌹..

سواليف من العام: صندوق الموسيقى [ ٤-١٠]

  

مساكم ربي بالرضا والسرور ، بعد إجازة سريعة رجعت بذهن صافي، أصفى من سما قرية تبعد عن الرياض ٢٠٠ كيلو ، انتو عارفين ان فيه نجوم كثيرة فوقنا ؟ جدران المدينة دفنت هالجمال السماوي ،  لو رفعت راسك في مدينة مليانه سيارات وشاحنات ومصانع ماراح تشوف النجوم اللي تسهر فوقك طول الوقت ، ولو كنتوا تعيشون في مكان هاديء يسمح لكم تشوفون السماء والنجوم بالليل احكوا لها ايمان تسلم عليكم . 

وعلى سيرة الجمال وأذواق الناس حولي واكتشافاتي اللي لقيتها العام من شخصيات ناس ما اعرفهم و المسرح والافلام والقصيدة هالمره نقفز للصوت ، ترى ذوقي في الصوتيات ذوق طفولي ، على سبيل المثال أحب صوت رشا رزق في مقدمات افلام الكرتون ، وأحب اسمع اشياء وطنية لأي دولة أو اجتماعية أو شغلات تضحك أو أشياء تحمّس زي اللي تشغلها المدربة في كلاسات الزومبا ..

١.علي نجم  *مذيع له مقاطع كثير عن الحياة الاجتماعية* تمرّ علي أوقات كثير ودي اسمع أحد يتكلم بدون مايسكت وبدون ما ينتظر رده فعل أو تعليق ،هالشيء موجود عند علي نجم الكلام الاجتماعي اللذيذ ،مع ان صوت الموسيقى بعض الاحيان أعلى من صوته إلا أن كلامه يستاهل إنك تمضي وقتك وأنت تسمعه ، له مقاطع كثير على اليوتيوب والساوندكلاود اخترت لكم ثلاث مقاطع :

[ الخيال الواسعالأهل – تعودت عليك ]
.

🌸🍃

.
٢.أيام .. وردة الجزائرية..   

أيام بنعدا ولو فينا نردا

كنا ردينا أوقات صارت هلا ذكريات

لكن يا خسارة الحياة تمرق ما فينا نردا

كنا رجعنا أحباب فارقناهم

كنا صالحنا أصحاب زعلناهم

كنا سامحنا يا للي جرحنا

كنا اللي مرة جرحنا رحنا نقله سامحنا

يا سنين لو فينا

منعيد ماضينا

حتى كل دمعة بكيناها

كنا بالضحكة محيناها

حرام نضيع أيام تمرق ما فينا نردها

رغم أن الكلمات مو جوّي بالمعنى الحرفي ، ما أحب البكاء على الأطلال ، اللي راح من الماضي وعشناه خلاص خلّص بأغلاطنا وبردود فعلنا اللي كنّا نعتقد وقتها انها كانت صح ، مااعرف لو يرجع الوقت بنتصرف بشكل أفضل ؟ 

الزمن مافيه خط رجعة لذلك ما احب ألعب لعبة *ماذا لو* ، يحكي محمد زيتون  أن هالأغنية آخر أغنية غنتها وردة وكأنها كانت وداعية ، حبيت الفيدو كليب المشاهد اللي فيه اجتماعية ومعبرة .. 

[ ساوندكلاود – يوتيوب ]

🌸🍃

٣. ردت الدنيا سلامي ..

ردت الدنيا سلامي ونشيدي

مزقت فجري لأشقى من جديدِ

حاصرتني بالطغاة وبالعبيدِ

أحرقت قلبي على اليمن السعيد

ردت الدنيا سلامي ونشيدي ..

يالله على جمال الكلمات اللي تلامس الوطن والانتماء له ، ويالله على الكلمات اللي ما تمجّد رؤوساء أو رموز وطنية ، كلمات تحكي عن الناس المطحونين تحت الاقدام ..

حالُنا كالليلِ حالِك

ساوندكلاود – يوتيوب ]

🌸🍃

٤. راوي ..
سعاد ماسي ..

حاجيتْاك ماجيتْاك

و ادّينا بعيد من هاذ الـدنيا

حاجيتْاك ماجيتْاك

كل واحد منّا فقلبهُ حكاية

كل واحد منّا فقلبهُ حكاية

صوت هالانسانه ياصوتها  ساوندكلاود ]

🌸🍃

٥.لاتبك فأحزان الصغر ..

لاَ تَبْكِ فأحزانُ الصِغَرِ

تَمْضِي كالحُلْمِ مع الفَجْرِ

وقريبًا تَكْبُرُ يا وَلَدِي

وتُرِيدُ الدَمْعَ فلا يَجْرِي…

يوتيوب بصوت حمزة نمر – ساوندكلاود ]

🌸🍃

٦. بلا ولا شيء لزياد الرحباني ورشا رزق 

بلا ولا شي

ولا في بهالحب مصاري

ولا ممكن في ليرات

ولا ممكن في اراضي

ولا في مجوهرات

صوت رشا جميل [ ساوندكلاود]

🌸🍃

٧.في البيت اجلس ..

في البيت أجلس، لا سعيداً لا حزيناً

بين بين. ولا أُبالي إن علمت بأنني

حقاً أنا … أو لا أَحَدْ!

 هالقصيدة لمحمود درويش بصوت بشار [ ساوندكلاود]

🌸🍃

٨. إذا تأخرت في النوم .. كارول سماحه

اذا تأخرت بالنوم فلن تغني لك الحساسين

ولن يحيك وجهي لأنني أمشي مع النهار لا إلى قرار

الكلمات للرحباني مقتبسة من مسرحية ملوك الطوائف ، هالمعلومة ماكنت اعرفها تكلم عنها باسل في الآسك وانا ادور القصيدة مكتوبة عشان اقتبس منها كم سطر .

*وقت كتابة هالسطور اسمع المسرحية ياجمال صوتها ياجماله*

[ساوندكلاود ]

🌸🍃

٩.عجبت منك ومني ..للحلاج 

عجبتُ منك و منـّـي يا مُنـْيـَةَ المُتـَمَنّـِي

أدنيتـَني منك حتـّـى ظننتُ أنـّك أنـّــي

ساوندكلاود ]

🌸🍃
١٠. Farewell

And I know you’re going And I know you’re going somewhere to make a better life

I hope that you find it on the first try

And even though it kills me

That you have to go

I know it’ll be sadder

If you never hit the road

So farewell

 💕

🌸🍃  

باقي ست اجزاء من الاشياء اللي اكتشفتها العام الماضي، ألعاب وتطبيقات حملتها وادمنتها ضروري تجربونها ، ومعلومات متفرقة ، وسواليف شخصية ، واجابات اسئلة فلسفية، وأخيرا وليس آخرا رسوماتي الكرتونية جزء منها من العام وبعضها رسمته في السنة الجديدة ومع ذلك راح اعتبرها ضمن انجازات العام.

شكرا لكل الزيارات والتعليقات والملاحظات 🌹

سواليف من العام : الدنيا مسرح كبير ياوالدي** [٣-١٠]

  

اكتشفت اني ما اشوف أفلام ولا مسرحيات ولا أحب أجلس وقت طويل اتفرج على مقطع طويل ، الا اذا احد رشّح لي الفلم او جلست مع أحد اتفرج عليه ، حصيلة هالسنة ما اعتبرها كلها من الانجازات واصلا ما تعتبر كلها من الافلام الجديدة بعضها قديم قدم التاريخ نفسه، الاكيد ان الأذواق تختلف ، اللي يعجبني مو بالضرورة يعجب غيري ، أحب القصة الاجتماعية او الألغاز أو الناس اللي عندهم صعوبات زي الاعاقات و الفشل أو مشاكل وبعدين يتجاوزونها وبرضو تشدني الافلام اللي فيها أطفال أو كبار في السن يعني تتكلم عن الذاكرة أو الزمن يتلخبط ..

📽
  

١.my name is khan

هالفلم الهندي عن شخص مسلم مصاب بالتوحّد تزوج بنت هندوسية وعندها ولد ، وبسبب أحداث ١١ سبتمبر انقتل ولدها لان زوجها مسلم ، فالزوجة تضايقت وقالت له وهي معصبة رح لرئيس أمريكا وقل له : “اسمي خان وأنا لست أرهابي” . وهو صدّقها وبدا رحلته عشان يوصل لرئيس امريكا ويقوله هالجملة.

رابط الفلم على [Imdb] وتقييمه ٨ من ١٠
  
📽


٢.الحاسة السادسة

سنة انتاج هالفلم قديمة قبل الألفية الجديدة ١٩٩٩ ، ما اقدر اقول القصة لأني بحرقها عليكم لو كنتوا مخططين تشوفونها ، اصنف الفلم درامي مع شويه رعب ، القصة باختصار شديد عن طفل يشوف الأموات .

رابط الفلم على [ Imdb  ] وتقييمه ٨.١ من ١٠.

📽

  
٣. The bond collector

برضو هالفلم قبل الألفيه ١٩٩٩ ، تصنيفه جريمة وغموض وتحقيقات وبرضو فيه مشاهد دمويه مقززة ، اللي يحمس في هالفلم فكرة المجرم المتسلسل اللي يترك وراه مفتاح لجريمة القتل اللي بيسويها ، صفحة الفلم على [  Imdb  ] تقييمه ٦من ١٠.

📽

  
4. The edge

وهالفلم بعد اقدم من الفلمين اللي فوق ١٩٩٧ واضح ان جوّي كان بيتحول لجوّ شيّاب ، المهم تصنيفه مغامرة ودراما واكشن وفيه برضو مشاهد دمويه ، ثلاث اشخاص يضيعون بغابة ويحاولون الهروب من دب مفترس يلاحقهم طول الفلم وبيموت اثنين ويبقى واحد الغني الشايب معليش حرقت الفلم هه، معلومات اكثر عن الفلم [ Imdb ] وتقييمه بالموقع ٦.٩ من ١٠.

📽
  
٥. مسرحية  بالنسبة لبكرا شو 

هالمسرحية سمعتها صوتيه ، الظاهر انها ما تمثلت او ما تصورت على مسرح ما اعرف ، المهم يكفي انك تسمعها ، المسرحية باللهجة اللبنانيه وتناقش قضاياهم الاجتماعية، ولأني أحب الصوتيات خصوصا اللهجات المتنوعة امضيت وقت ممتع وانا اسمعها ، فيه مقطع راااسخ في ذهني من هالمسرحية : 

الفقر بيفزع نجيب ،نحن بس كنا فيه ماكنا شايفينوا عايشين هيك طبيعي ماحاسين .بس طلعنا شوي منو شفناه من بعيد ،بيفزع أكثر صار ومش معقول نرجع

لو حابين تسمعون المسرحية كاملة على [ الساوندكلاود ]

📽

  
٦. مسرحية شقائق النعمان  لدريد لحام
هالمسرحية اللذيذة تمثلت عام ١٩٨٧ تكلمت عنها خالتي قماشة بحسابها في تويتر ، المحتوى لهالمسرحية شيء مذهل كاتب المسرحية اظن انه محمد الماغوط وتتكلم عن الوضع الاجتماعي السياسي للوطن العربي ، اكثر جزء حفظته من المسرحية هو هذا :

ظلم الدنيا قبلته بس في الآخره في الله في عدل في حق بآخد حقي عندو أنا ، انا مظلوم لك يا ابني ، الله بحبو وطول عمري بحبو ، هو اللي بيهدّي الزلازل بيطفي البراكين ، بينزل مطر بيفتح زهر بيحي العظام وهي رميم. 

الله اللي بنعبدو عبادة ، هو اللي بيشفي المريض ، وبيطعمي الجوعان ، بيدفي البردان ، بيرد غربه الغريب ، ويهدي الطير لعشو والبحار لشطو يا استاذ .

يا استاذ الله محبه ، الله كثير حنون ومتسامح ولك يا ابني، بصدقه لفقير بيومين صيام بشمعه لكنيسه بيغفر وبيسامح، 

نحنا هالمظلومين والمعترين من يوم ابونا ادم لهلّا،عمرها ما كانت مشكلتنا مع الله ،مشكلتنا مع اللي بيعتبروا حالون بعد الله. 

اسمعوها هنا [ Youtub – Soundcloud]

📽

  
٧.  PK

فكرة هالفلم جميلة وتتكلم عن اختلاف الاديان في الهند ، تصنيفه كوميدي ودراما ورومنسي ، الشخصية الاساسية عبارة عن مخلوق فضائي نزل لكوكب الأرض ، والطريف انه يسأل اسئلة فلسفية تستفسر عن آلهه كل ديانه ومايقدرون الناس يجاوبون اجابة منطقية ، وركز الفلم على اللي يتاجرون باسم الدين. 

   

   
  
الصور اخذتها من هالمقال ، معلومات اكثر عن الفلم [  Imdb ] وتقييمه ٨.٣ من ١٠.

📽

  
٨. فلم البؤساء  Les Misérables

مأخوذه من رواية البؤساء لفيكتور هوجو ، فلم ملحمي عن الحب والثورة  كل الحوارات اللي فيه عبارة عن رحلة جميلة ،كمية جمال بين حوارات كوزيت وچان فالچان🎵.

📽

  
٩. The kid لشارلي شابلن

مستحيل يكون هالفلم من عام ١٩٢١ ، فلم صامت جميل، لغة الجسد مذهلة ،المواقف التهريجية ضحكتني كثير ،  واهتمام شارلي بالولد الصغير والعاطفة اللي جمعتهم مع بعض رغم حاله الفقر اللي كان يعيشها شارلي وكيف الطفل متفاعل معه ومواقفهم العفويه لما اشتغلوا مع بعض ، جميل هالفلم تصنيفه كوميديا ودراما عائلي صفحه الفلم على [ Imdb   ] وتقييمه ٨.٤ من ١٠.

📽

  
١٠.  inside out

هذا الفلم جوّي مفصل تفصيل على مزاجي ، شفتوا الشخصيات الملونة اللطيفة في غلاف الفلم ؟ لقد وقعت في غرامها ، تقييم الفلم  ٨.٣ من ١٠ وتصنيفه كوميديا انميشن ومغامرات ومناسب  للجميع ، صفحة الفلم على [  Imdb ] .

.

.
راح اوقف اجازة كم يوم ،وارجع اكمل واحكي لكم الشغلات اللي تعرفت عليها العام الماضي .

استودعكم الله 🌹

سواليف من العام : الحكي لو تحوّل قصيدة [٢-١٠]

  

عدت اليكم من جديد ، والجد أني انبسطت بردود الفعل اللي وصلتني على الجزء الاول من ناس ما اعرفهم ، عدد المشاهدات الكثير اعتبره انجاز بالنسبة لي ، ممتنه لزيارتكم وتعليقاتكم🌹.

.
لو كان الكلام أكل لكانت القصائد ادناه ألذّ وجبة أكلتها العام الماضي ، متخيلين أن اللغة اللي نكتبها ونتكلمها ممكن تترتب بطريقة مختلفة ، وتعبر عن مواقفنا ومشاعرنا اللي ماقدرنا بيوم نعبر عنها؟ يعني لو اسولف من اليوم لبكرا عن المطر والربيع ماراح اجيب نص الجمال في قصيدة السياب في أنشودة المطر ، ولو تكلمت عن الفقد او موت اشخاص كانوا بيننا ماراح اجيبها بنفس طريقة نزار قباني لمّا نعى ولده وزوجته ، ولا باسلوب الجواهري لما نعى زوجته الأولى ، ولا بقدر اوصل شعور الانسان البسيط اللي بعيد عن اهله ومتغرب عشان كسب المال زي ماكتب الابنودي في رسايل الأسطى حراجي، ولاحتى اقدر اوصل سلاسه ونعومة الفكرة زي بنت السمان و روضة الحاج..   

🎵

١. بدر شاكر السياب 

السياب اكتشفته مؤخرا ، قريت لواحد عراقي ان السياب مات بالكويت ولما نقلت جنازته للبصره عشان يدفنونه هناك ، كان الطقس ممطر 🌧 .. 

اتعلمين أي حزن يبعث المطر

وكيف يشعر الوحيد فيه بالضياع

كأنِّ طفلاً بات يهذي قبل أن ينام :

بأنَّ أمّه – التي أفاق منذ عامْ

فلم يجدها ، ثمَّ حين لجّ في السؤال

قالوا له : “بعد غدٍ تعودْ .. ”

لا بدَّ أن تعودْ

المزيد : [ نصيابصوت ريم بنابصوت محمد عبده  ]

🎵

٢.الجواهري

برضو الجواهري شاعر عراقي اكتشفته مؤخرا ، وما اعرف وش سالفتي مع قصائد النعي ؟ قصيدته “ناجيت قبرك” توجع القلب يرثي فيها زوجته الاولى وماكان عندها لما ماتت كان في لبنان ..

في ذِمَّةِ اللهِ ما ألقَى وما أجِدُ …

                                   أهذِهِ صَخرةٌ أمْ هذِه كبِدُ

قدْ يقتُلُ الحُزنُ مَنْ أحبابهُ بَعُدوا…

                                    عنه فكيفَ بمنْ أحبابُهُ فُقِدوا

المزيد: [ نصيابصوته ]
🎵
٣.غادة السمان 

قريت لغادة كم كتاب من سلسلة الاعمال الغير كاملة ( مواطنة متلبسة بالقراءة و الجسد حقيبة سفر )، واكتشفت قصيدة أميرة البحر  ، ولها أميرة في قصرها الثلجي.

مسكينة ومبتلة

كمتسول شتائي

حاولت أن أقول له

انني انا أيضاً جادة ! ..

ولكنني (أبداً أبداً)

لن أتركه يسجنني

داخل دائرة مرسومة بالطباشير

على جدار ما .. أرض ما .. مسرح ما ..

لن أتركه يسجنني ،

لا باسمه ، ولا باسم الحب ، ولا باسم الشهرة ،

ولا باسم أحد .

المزيد: [ القصيدة كاملة  ]

🎵

٤+ ٥ + ٦ . الابنودي 

قصايده باللهجه المصريه وكأنه يسولف ومع ذلك حفظتها عن ظهر قلب خصوصا ثلاث قصايد حطيت لكم روابطها على الساوندكلاود.

[ العمّه يامنه احزان عادية رسايل الأسطى حراجي ]

ولو حابين تقرونها نصا تلقونها بموقع [ أدب

🎵

٧. نزار قباني

طبعا المعروف  انه شاعر المرأة وشعره غزلي ، الا اني اكتشفت له قصائد جميلة لما نعى زوجته – مو عارفه سر انجذابي لقصائد النعي – يمكن احب النكد ؟ هه

بلقيسُ ..

مذبوحونَ حتى العَظْم ..

والأولادُ لا يدرونَ ما يجري ..

ولا أدري أنا .. ماذا أقُولْ ؟

هل تقرعينَ البابَ بعد دقائقٍ ؟

هل تخلعينَ المعطفَ الشَّتَوِيَّ ؟

المزيد: [ نصياصوتيا ]
🎵

٨.برضو لنزار في نعى ولده توفيق شيء يحزن بكيت وكأن ولده ميت قبل شوي .

أتوفيق..

لو كان للموت طفل، لأدرك ما هو موت البنين

ولو كان للموت عقل..

سألناه كيف يفسر موت البلابل والياسمين

ولو كان للموت قلب .. تردد في ذبح أولادنا الطيبين

المزيد : [ نصياجزء بسيط صوتي ]

🎵

٩.روضة الحاج ..

وبعيدا عن النكد والموت تجي هالشاعرة السودانية الرقيقة ذات المفردات الجميلة، زمان كلمتني عنها ليلى العبدالله ، هنا مجموعة قصائد لها في موقع [ أدب ].

🎵

١٠. يوميات امرأة متمردة 

فسبحان الذي سواه من ضوء

ومن فحم رخيص نحن سوانا 

وسبحان الذي يمحو خطاياه 

ولا يمحو خطايانا  

للمزيد عن القصيدة أعلاه: عندكم قوقل 🙊

🎵


 اذا رجعت بحكي لكم عن الافلام والمسرحيات اللي تفرجتها العام ، اتمنى لكم يوم جميل .